ازاي تعرف انك في فرح مصري؟

ازاي تعرف انك في فرح مصري
من البدايه كدا هتلاقى الدعوه بتاعت الفرح جايالك وعليها عباره ..
[جنه الاطفال منازلهم]

يعنى من الاخر ابنك دا يقعد فى البيت ومايورناش وشه
احنا مش عارفين نأكل المعازيم لما هانأكل سعادته

لما تلاقى الزفه الدمياطى الازليه اياها
وبسم الله الرحمن الرحيم وهانبتدي الليله اااااه اااه

وتلاقى البنات بيجروا ورا العروسه عشان ينولوا شرف صحبتها كدا وهى داخله القاعه ويتقاسموا شرف انهم يشيلوا ديلها اقصد ديل الفستان

لما تلاقى العريس بيبخر العروس عشان الحسد احسن تتكسر ولا حاجه
وتلاقى العروسه بتبخر العريس احسن دا واخد عليها كمبيالات وشيكات
عشان قطع الغيار الغير متوفره وممكن يواديها فى داهيه

لما تلاقى بقا الستات بتمارس احسن هوايه ليها على مر التاريخ وهى النميمه
ويقعدوا بقا يقولوا:
انا عارفه يا ختى اخدها على ايه دا لا مال ولا جمال
والتانيه تقولها :
والله يا ختى من ناحيه الجمال فهى شبه الليفه المحروقه لكن من ناحيه المال لا دا الواد وقع واقف اه دا ابوها عنده عربيه كارو اقصد (ماقطوره )بتدخلوا شىء وشويات

وتلاقى البنات بقا واقفه اللى تقول:
ايه دا فستانها بيئه اوى ايا
والتانيه تقولها:
اكيد مأجراه من عند الكوافير اللى عملها التسريح اللى شبه تسريحه المجانين دى

لما تلاقي قرايب العريس مش عاجبهم قرايب العروسه و العكس صحيح طبعا و بيبصوا لبعض بإشمئزاز

لما اول حجه تسمعها اول ما تدخل القاعه وقبل ما تشوف العروسه والعريس
اغنيه هشام عباس (اسماء الله الحسنى)

لما تلاقى بتاع الكاميرا بيزوووم على الشبكه كانها مثلا قلاده الملكه اليزابيث الخامسه والعشرين
وتلاقى كل المعازيم هايماوتوا بعض وينطوا فوق بعض عشان يتفرجوا عليها

لما العريس والعروسه يرقصوا الرقصه الرومانسيه الازليه على اغنيه(غمض عينيك واحلم معايا) او اغنيه تامر حسنى(ومايحرمنيش منك)
وكل البشر بيصوروهم بكاميرا الموبايل وهما بيقولوا لبعض
(ياترى بيقولها ايه)

لما تلقى الاغنيه الرومانسيه اتقطعت فجأه كانهم بيقولولهم انجزوا ويروحوا مشغلين اغنيه السهره(هاتجوز) لـ سعد الصغير وبعدها العنب لمعبود الجماهير (بعرورر)

لما تلاقى ام العريس كل نص ساعه وتمسح عرق ابنها وتقوله
(يا بنى كفايه مش كده ...ماتهدش نفسك)

لما تسمع السؤال الابدي
(هو البوفيه هايفتح امتى...الواحد جاع)

لما يتعرض الفيلم التسجيلى البوفيه وكل ما يحتويه من لحمه وفراخ وديك رومى وكشك وسد الحنك

لما تسمع الناس وهيه بتقول
لالالا بس الاكل مكانش قد كده
بعد تناول الطعام مباشره وعلى راى المثل
(بعد ماكل واتكى قال رحته مستكه)

لما تلاقى ام العروسه بتقول للعريس
خد بالك منها يا حبيبي
والعريس يقولها
دى فى عينى يا طنط

لما تلاقى الزفه انطلقت فى الشوارع مسببه الازعاج لخلق الله
وبيب بيب بيب بيب بيب بيب بيب بيب بيب

فعلا ده الي بيحصل في اغلب الافراح المصريه
شكرا ليك حكيم علي الموضوع الجميل ده

ومهما حصل ف الافراح دي
فهتفضل طول عمرها جميله وليها جو مميز وجميل

موضوع بجد جميل
و الله جو لطيف و هيا دى مصر
هيا ساعات الاغانى الشعبيه بتكون رخمه شويه بس احسن من مفيش

لما تسمع السؤال الابدي
(هو البوفيه هايفتح امتى...الواحد جاع)
ده اهم حاجة في الليلة كلها
هههههههههههههه

منوراني يا منه
وبجد مفيش احسن من جو مصر

واكيد يا باشا اهم حاجه في الليله دي كلها البوفيه ههههههههههههههه
منورني يا جميل

ههههههههههههههههه

فعلا والله ياكيمو

دة اللى بيحصل فعلا

ربنا يوفقك ياحبيبى

منورني يا باشا
وعقبال فرحك يااااااااااارب

» ازاي تعرف انك في حاله حب ؟؟؟؟.
» ماحدش يسألني ازاي...راجل حامل...معرفش ازاي
» سواق مصري بروفشنال
» حوار مصري جدا انما ايه (تحفه)
» ازاي تنسي حد حبيته؟